يامذهله ياللي تربعتي على عرش الجمــال
يا غلا ملاكن في رحاب الكون كله واجمله
انتي لحالك مملكة للحسن و اسراف الدلال
ياتاج راس الحسن يا ذروة سنـامه واكمله
احرقتي قلوب النســا حيرتي عقول الرجال
سويتي اللي ما تسـويه السيــوف المصقله
من شاهدك لد النظر لو كان في وقت القتال
ما عـاد همه غير شوفـك لو عـدوه جنـدله
ذبحتي العشــاق بسهوم المعاكـيش الطـوال
النعاسـات السـاحرات الفاتنـات المسبـله
الورد يتبـسم بوجنه كالبـدر ليـلة كمـــــال
واللي يشـوف التوت من فـوق الأآلي يشـغــله
لا ذعذع الغـربي تثنى غصنـك المـايس ومــال
العين مالت والـقـلوب مع العيـون مميــــله
صدفه لمحتك وانكوى قلبي ودمـع العين ســـال
كني كسير السـاق في ممشـاي ياكـود انقــــله
دخلت من باب الصدف واقفيت من باب المحــال
شرعت في بحر الهـوى واثر اليخـوت مطــــوله
غرقت بامواج البحـر وانتي على شط الرمـــال
الطـوق بيدينـك وانا ميت غـرق .. اتأمــــله
امسيت حالم والفكر يبنيك من نسج الخيـــــال
وابطـيت ماعنـدي خيـال الا لقــاك اتخيــــله
فرشـت لك عين وهـدب .. فيني ولا قلتي تعـــال
مديت قلـبي للطعون .. وكـل جـرح اتحـمـــله
جيتك وانا كلي الم ما جيت لك من طيب حـــال
جيتـك عيـوني من صواديف الليــالي مهمـــله
جيت اتوقا عن سمـوم الهجر وابني بك ظــلال
جيت اخـذ لجـرهد زمـاني من حنانك بوصــــله
جيت اطوي ابعاد المسافه شوق عاشق للوصـال
جيت انصر الخفاق من جور السنين الممحـــله
اسرفتي بصـدك وانا ما عـاد بي قو احتمـــــال
الي متى بصبر على جمـر المفـارق والـــــوله
غرست لك بذرة وفـا لين اثمرة والغصن طـــــال
واسقيتني من كـف يمنـاك السـمـوم مهيــــله
حتى الامـل ذابت شمـوعه في دياجـير الليــــال
الي مـتى تبـكي دياجـيرالامـــل يامذهــــله؟
[center]
الإثنين أبريل 08, 2013 4:33 am